ஶ்ரீ:
பதிவு : 314 / 480 / தேதி :- 18 ஏப்ரல் 2018
* முதல் விதை *
“ நெருக்கத்தின் விழைவு ” - 10
விபரீதக் கூட்டு -04
நான் வைத்தியநாதனை நம்பி இருக்கக்கூடாது . அவருடான எனது உறவை ஒரு எல்லைக்குள்ளாக நிறுத்திக்கொள்ள வேண்டும் என்கிற , எனது அடிப்படை தீர்மானத்தை எந்த புள்ளியில் மறந்தேன் என எனக்கே தெரியவில்லை . அரசியல் என்பது, சர்வ நேரமும் புலன்கள் விழிப்பு நிலையில் இருக்க வேண்டும் என்பது அடிப்படை விதிகளில் ஒன்று . ஒரு கட்டத்தில் நான் விழிப்பற்று இருந்தது ,இத்தகைய ஆபத்தை நான் வலிந்து ஏறிட்டுக்கொண்டதானது .
வல்சராஜ் அரையில் தில்லி செல்லுவது குறித்த , எனது உரையாடல் நிகழ்ந்தபோது அங்கு வைத்தியநாதன் இருந்தார் . பெரும்பாலும் அவர் வல்சராஜுடன் அவரது அறையில் இருப்பவர்தான் , அன்றும் இருந்ததால் அது எனக்கு வித்தியாசமாக படவில்லை . நான் என்ன செய்யப்போகிறேன் என்பது குறித்து அவருடன் விரிவாக பேசினேன் . அதில் பல உட்கட்சி அரசியல் நிலைகளை பற்றியும் எனது வரிவான அவதானிப்புகளும் இருந்தன .அனைவருக்கும் தில்லிக்கான டிக்கெட்டை தலைவர் எடுப்பதாக இருந்தது, மற்றைய செலவுகளுக்கு பற்றி வல்சராஜ்உடன் பேசிக்கொண்டிருந்த போதுதான் ,தான் அதை செய்வதாக வைத்தியநாதன் சொன்னார் .
முன்னாள் அமைச்சர் ஆனந்த பாஸ்கரனும் அப்போது உடன் இருந்தார் , அன்று நிகழ்ந்தது எனக்கும் வைத்யநாதனுக்குமான தனிப்பட்ட உரையாடல் அல்ல என்பதால் , அவர் தாமாக முன்வந்து உதவுவதாக சொன்னதும் , வல்சாராஜ் மௌனமாக இருந்ததும் அதற்கான அங்கீகாரமானது . நான் விருப்பாத போதும் என்னால் அதை மறுக்க முடியவில்லை . அதை அங்கு என்னால் மறைக்கவும் முடியாது . மேலும் அனைவரையும் வைத்துக்கொண்டு அவர் சொன்னதால் , அதை எனக்கானதாக பார்க்கவில்லை.
அவரிடம் நான் கேட்டதாகாதும், வல்சராஜ் முன்பாக அதை அவர் சொன்னதால் , அவரிடம் வல்சராஜ் முன்னமே பேசியிருக்கலாம் என்கிற புரிதலுக்குத்தான் நான் வந்தேன் . ஆனால் அவர் தனது வழமையான அரசியல் சித்து விளையாட்டை அவர் என்னிடமும் தொடங்கிவிட்டார் என்பதை அப்போது நான் அறிந்திருக்கவில்லை . அங்கு எனக்கும் அவருக்கமான நெருக்கம் இருப்பதாக ஒரு தோற்றம் வால்ராஜிடம் காண்பிக்கப்பட்டு இருக்கலாம் . இது அதன் பிறிதொரு கோணம் என நான் அப்போதே புரிந்திருந்தாலும் , அதில் எனக்கு அக்கறை இல்லை . அது அவருக்கும் வல்சராசுக்குமானது , எனக்கு சம்பந்தமில்லாதது, என எண்ணினேன் .
இது சம்பந்தமாக அவரை நான் தனிப்பட்ட முறையில் வந்து சந்திப்பேன் என அவர் எதிர்பார்த்திருக்கலாம் . அதுதான் அவருக்கான சந்தர்ப்பம், என்னுடன் அவர் நிகழ்த்த விரும்பிய உரையாடலை அல்லது பேரத்தை பற்றிய திட்டம் அவருக்கு இருந்திருக்கலாம் . பொருளியல் உதவியை ஒருவரிடம் எதிர்நோக்கும் நேரத்தில் நமக்கு கொடுக்கப்படும் அழுத்தம் வலுவானது . எந்த காரணம் கொண்டும் அவர்கள் சொல்லுவதற்கு கட்டுப்பட வேண்டிய நிர்பந்தம் இயற்கையில் எழுவதை யாரும் தவிர்க்க இயலாது . அவர் எனக்காக காத்திருந்தார்
கருத்துகள் இல்லை:
கருத்துரையிடுக