ஶ்ரீ:
பதிவு : 225 / 311 / தேதி :- 01 நவம்பர் 2017
* மரபின் மீறல் *
“வாய்ப்புகளில் புரியாமை - 10 ”
கருதுகோளின் கோட்டோவியம் -01.
நிர்வாகிகளின் நியமனத்திற்கு பின்னர் வல்சராஜ் மாஹே கிளம்பி சென்றுவிட்டார் . இம்முறை அங்கு அவருக்கு ஏதோ அரசியல் நிர்பந்தம் புதுவைக்கு திரும்ப இரண்டுமாதமாக்கலாம் என்கிற சூழலில் தான் என் நண்பர் என்னை சந்திக்க வந்தார் . அவர் வந்ததினாலேயே இதன் பின்புலத்தில் யார் இருக்கிறார்கள் என்பது தெளிவாக தெரிந்து போனது . வல்சராஜ் இல்லாத நேரத்தில் செயல்பட ஒரு குழு அமைப்பதன் அவசியம் பற்றி எடுத்த எடுப்பில் நேராக என்னிடம் சொன்னார் . இது என்னை தொடக்கூடாது இடத்தில தொடுவது . இருப்பினும் எனது வருத்தத்தை வெளிக்காட்டிக்கொள்ளாது , நான் வெறும் பொதுச்செயலாளர் மட்டுமே நீங்கள் வல்சராஜுடன் கலந்துபேசி ஒரு குழுவை அமைக்க சொலுங்கள் . நான் இணைந்து செயல்பட தயாராக இருக்கிறேன் என்றதும் . தான் நட்பின் அடிப்படையில்தான் இதை சொல்லவந்தேன் என்றார் . அரசியல் நம் நட்பின் அடிப்படையில் செயல்படுவதல்ல என்று சொன்னேன்
அந்த பால் விலையுயர்வு எதிர்ப்பு போராட்டத்திற்கு பின் கட்சிக்குள் பல்வேறு தரப்பிலிருந்து பலவகை எண்ண அலைகளை உருவாகிவருவதை அறிய முடிந்தது . கட்சிக்கு முகமாக தலைவர் இருப்பதனால் நடைமுறை அரசியலில் புதிய வகைமுறை என்கிற ஒன்றை தனித்து எவராலும் அவரிடம் முன்வைக்க முடியவில்லை . அதை போன்ற ஒன்றை அவரிடம் சொல்லி, அவர் மூலமாகத்தான் அவற்றை செய்யவேண்டிய நிலை . அதை நடைமுறை படுத்துவது தலைவரின் முடிவைப் பொருத்தது . இவர்களின் வகைமுறைக்கு பின்னால் சொந்த கணக்கிருப்தால் அரசியல் ரீதியில் அவரிடம் பேசுவது நின்றுபோய் இருந்தது .
நான் நடத்திய நிகழ்விற்கு பிறகு இளைஞர் காங்கிரஸ், கட்சியை நகல் செய்யும் அமைப்பாக எல்லோருடைய கண்களிலும் தென்பட்டிருக்கலாம் . என்னிடம் அவர்களால் உரையாடமுடியாமைக்கு நான் வேறொரு தளத்திலிருந்து காரணம் . நான் தற்சார்பு பலம் பெரும் முயற்சியில் இருந்தேன் . அது நீண்ட நாள் பலன் தரும் திட்டம். அவர்களுக்கு புரியாததில் வியப்பில்லை. என்னுடை ஒத்துழையாமையை என் அரசியல் போதாமை அல்லது புரியாமைய காரணமென அவர்கள் யூகித்திருக்கலாம் . அது மட்டுமல்லாமல் என்னுடன் அவர்களின் தனிப்பட்ட லாபங்களை சொல்ல ஒரு தயக்கமிருந்திருக்கலாம் .
அதற்கு மாற்றாக அவர்களின் கணக்குகளுக்கு ஒரு இணை தலைமை தேவைபட்டிருக்கலாம் . ஒருவகையிலும் நான் அவர்கள் சொல் பேச்சு கேளாதவன் என்பதைப்பற்றிய தெளிவு அவர்களுக்கு இருந்தது . அவர்கள் என்னை முழுமையாக ஒதுக்கும் எண்ணத்தில் எனக்கு இணையான அல்லது என்னை சமாதானம் செய்யக்கூடியவனாக எனது நண்பனை தெரிவு செய்திருக்கலாம் . அவன் வல்சராஜ் கமிட்டியில் அந்த நண்பர் முக்கிய நிர்வாகிகளில் ஒருவராக வந்தான் .
அவன் அந்த பதவிக்கு வந்தது ஒரு தறசெயல் . அது அவனது விழைவின் விளைவு மட்டுமே என்று நினைத்திருந்தேன் , ஒருநாள் அவன் என்னை தேடி அரசியல் பேச வரும்வரை .அது வழமையான சந்திப்பு என்றே ஒரு தருணம் வரை நினைத்தேன் .தலைவரை சார்ந்த அமைப்பினுள்ளேயே ஒரு சிலர் என்னை கட்டுப்படுத்தும் மையத்தை உருவாக்க நினைத்து , என் நண்பரை என்னுடன் பேசுவதற்கு அனுப்பியிருந்தார்கள் . பிறிதெவரையாவது அனுப்பி இருந்தால் இதை ஒரு உட்கட்சி ஜனநாயாகப்போக்கு என்கிற அடிப்படையில் நான் அதைக் கையாண்டிருப்பேன் . நண்பர் ஏற்கனவே அவருக்கு நான் உதவ மறுத்ததாக எண்ணி என்மீது காழ்ப்பிலிருப்பது எனக்கு தெரியும் . கசப்பு நட்பிலே நிகழும்போது தீர்ந்து விடும் வருத்தம் . என்றாவது ஒரு நாள் அதை சரியாகிவிடும் .ஆனால் அரசியலில் அது சரி செய்யவே முடியாமல் போய்விடுவதை பார்த்திருக்கிறேன் .
இந்த சந்தர்ப்பத்தை பயனபடுத்தி நட்பை சரிசெய்யும் பொருட்டு நான் என்னவெல்லாம் சொன்னேனோ அவை அத்தனையும் எனது அரசியல் வாய்ஜாலம் என்றே எடுத்துக்கொண்டான் . நான் சொல்ல வந்தவை மறுபடியும் பிழையாக மாற்றிக்கொண்டு என்னுடன் நேரடியாகவே முரண்பட்டு , தன்னால் மாற்று மையத்தை உருவாக்கிடமுடியும் என்னும் , ஒரு நல்லெண்ணத்தில்தான் என்னை அனுகியதாக சொன்னது . எனக்கு மிகுந்த ஆச்சரியத்தை தருவதாக இருந்தது.
கருத்துகள் இல்லை:
கருத்துரையிடுக