ஶ்ரீ:
பதிவு : 210 / 290 / தேதி :- 11 அக்டோபர் 2017
* தவறாத வாய்ப்புகள் *
“தனியாளுமைகள் - 36 ”
இளைஞர் அமைப்பின் கருதுகோள்-12
அரசியலில் விளையாட்டாக ஒரு சொல்லுண்டு .இளவரலான ஒன்றுக்கு தலைமை தாங்க வாய்ப்பு கிடைத்து அதை இழப்பவன் அதை பின்தொடரும் ஆகப்பெரிய பிறிதொன்றையும் சேர்ந்தே இழப்பான் என்பது . இது ஒரு எள்ளல் போல தெரியும் . ஆனால் சரியான வாய்ப்புகள் முதல் நிலையிலேயே தெரிவதில்லை , தொடர்நிகழ்வுகளினூடாக . சில அற்புத தருணங்கள் தற்செயலாக நிகழ்ந்து பின் பெரிய வாய்ப்புகளாக அவை பரிமாற்றமடைவதை பார்த்திருக்கிறேன். என்னை பெரிய அளவில் வளரவும் , தொகுக்கும் வாய்பளித்தவைகளின் பல சிறிய துணுக்காய், தற்செயலாக நான் கண்டடைந்தவைகளே .
காலை மாணவர் காங்கிரசின் தலைவர் ரஹ்மான் அலைபேசியில் கூப்பிட்டிருந்தான் . கடசிக்குள் எனக்கான சில நண்பர்களில் ஒருவன் . எல்லாவற்றிலும் முரணான பார்வை உள்ளவன் . அவன் என்னிடம் என்ன கோரினாலும் அதை பலமுறை அவதானித்து செய்ய முயற்சிப்பேன் . அவன் அலைபேசியில் என்னிடம் சில விஷயம் பேசவேண்டுமென்றான் . முதிரா இளைஞைனெனும் தனியான அணுகுமுறை எப்போதுமுள்ளவன் . அவன் எனக்கு அணுக்கமானது . தாகூர் கலைக்கல்லாரி மாணவர் தேர்தலின்போது தான் .
1996 தேர்தலில் கட்சி தோல்வியுற்று ஆட்சியை இழந்த சமயமது . தலைவரைக்காண நான் சென்றிருந்தபோது உள்ளே ரஹ்மான் தலைவருடன் கல்லூரி தேர்தலை பற்றி ஏதோ வேகமாக பேசிக்கொண்டிருந்தான் . அவனது முதிரா இளைஞனின் அனுகுமுறையால் தலைவர் அவனை சிறுவனைப்போல நடத்துவது வழமை . அவனது எல்லா செயகைகளும் அப்பிடித்தான் இருக்கும் . நான் உள்ளே சென்றமர்ந்த சிறிது நேரத்திற்கெல்லாம் இருவருக்குள் நிகழ்நத பேச்சு ஒரு விவாதம்போலாகிவிட்டது .
கல்லூரி தேர்தல் விஷயத்தில் நாம் செய்யக்கூடிய சில விஷயங்களை தலைவர் அவனிடமே சொல்ல அவருடன் முரண்பட்டபடி சென்று கொண்டிருந்தது அவனது பேச்சி . ஒரு கட்டத்தில் அவனுடன் பேசுவதை நிறுத்திவிட்டு தலைவர் விருட்டென எழுந்து தனது பின் அறைக்குள் சென்றுவிட்டார் . ரஹ்மான் அவரது மனநிலையை உணரவில்லை . என்னிடம் திரும்பி அவருக்கு என்ன சொன்னானோ அதையே என்னிடமும் சொல்ல ஆரம்பித்தான் .
கட்சிக்குள் பல்வேறு பிரிவுகள் பல தளங்களில் செயல்பட்டுக்கொண்டிருந்தன . அவற்றுடன் இணைந்து செயல்படும் சந்தர்பங்களை நான் தவறவிடுவதில்லை. ஆனால் எனக்கு மாணவர் தேர்தல் மற்றும் தொழிற்சங்க அரசியலிலும் என்றும் நாட்டமிருந்ததில்லை .இரண்டும் வெவ்வேறு அரசியல் முறைமைகளை கொண்டது . எனது அரசியல் முறைமைகள் அந்த பாணி முறைமைகளுடன் ஒத்துப்போவதில்லை . தொழிற்சங்க அரசியல் பகுதிநேர அரசியலன்று . அவர்கள் வேறுவிதமான திரள் . உடலுழைப்பு ,பொருளியல் பற்றாக்குறை, சட்டசிக்கலான நீதிமன்ற வழக்கு நடைமுறைகள் என தினசரி வாழ்வியல் சங்கடங்களில் உழல்பவர்கள் . அதில் அரசியலென்பது அவர்களின் தேவைகளையும் விழைவுகளையும் நிகர் செய்து கொள்வதே . அவர்களை ஒருங்கிணைக்கும் அரசியலையும் கூட ஒரு கட்டத்தில் சுமை என நினைப்பவர்கள் . ஒரு அரைநாள் விடுப்பு பெற்றுத்தர இயலாத நிலை வருமானால் சிறிதும் தயங்காது தொழிற்சங்கத்துடன் முரண்பட தயங்காதவர்கள் .
அரசியல் நுண் புரிதல்களால் ஆனது . நாளை என்கிற ஒன்றை நினைவில் கொண்டேதான் அரசியலை முன்னெடுக்க முடியும் , அனால் தொழிற்சங்கமென்பது இன்றில் மட்டுமே வாழ்வது , அவர்களுக்கு லட்சிய கனவுகளை ஏற்றுவதைப்போல மடமை பிறிதொன்றில்லை . அவர்களின் தலைவன் அவர்களுக்குள்ளிருந்தே எழுந்து வரவேண்டியவன் . வெளியிலிருந்து எவரும் அவனை நிகர் செய்துவிட முடியாது . அவர்களை பேசுமொழியும் அடைதலும் ,விட்டுத்தருதலும் வேறொரு தளத்தை சேர்ந்தது .
மாணவர் அரசியலென்பது கொள்கை கோட்பாடு என எதையும் அடிபடையாக கொண்டதல்ல . அதுஒரு களியாட்ட போல ,வேடிக்கை சம்பவம்களின் தொகுப்பு . கல்லூரித் தேர்தலென வந்துவிட்டால் . அது ஒருமாத கூத்து ,அதை நிகழ்த்துவதற்கு அவர்களுக்கு தேவை வேடிக்கையான அரசியல் சார்புநிலை என்பது பொருளியல் உதவி ஒன்றே .
பெரும்பாலும் ஆளுங்கட்சியின் ஆதரவைப்பெறவே அவர்கள் விழைவது வழமை. மாணவரமைப்பு தேர்தலில் கட்சி சாயம் பூசுவது போல மடமை பிறிதொன்றில்லை. தேர்தலுக்கு பின் அவர்களின் நட்பே முன்னிற்கும் . அதுதான் சரியானதும் கூட .
மாணவர் திரளிலிருந்து அரசியல் அமைப்பிற்குள் தலைவரான எழுந்த வந்தவர்கள் மிக சொற்பமானவர்கள். அவர்களை தாண்டி பிறிதெவரும் கட்சி சார்பாக நின்றாதாக நான் அறிந்த வரை எவருமில்லை . ரஹ்மான் தனக்காக தலைவரிடம் பேசும்படி என்னிடம் சொன்னான் . என்னால் ஏற்றுக்கொள்ள முடியாத ஒன்றை நான் விளையாட்டிற்குக்கூட முயற்சித்ததில்லை . உறுதியாக மறுத்துவிட்டேன் . அவன் விடாது என்னிடம் பேசியபடி இருந்தான் . அவனது தொல்லைதங்காது நான் அருகிலிருந்த தினசரி பத்திரிக்கையில் ஒன்றை எடுத்து படிக்க துவங்கினேன் , அவன் சொல்ல வந்ததை நிறுத்தவேயில்லை . சற்று நேரத்தில் திருப்பி வந்த தலைவர், என்னிடம் “என்ன சொல்கிறார் மாணவர் தலைவர்” என்றார் எள்ளலுடன் . நான் பேப்பரை மடித்துவைத்து உங்களிடம் என்ன சொன்னானோ அதையே என்னிடமும் சொல்லிக்கொண்டிருக்கிறான் என்றேன் . ரஹ்மான் விடுவதாக இல்லை .தான் விட்ட இடத்திலிருந்து மறுமுறையும் அதையே சொல்ல துவங்கினான்.
கருத்துகள் இல்லை:
கருத்துரையிடுக