ஶ்ரீ:
பதிவு : 180 / 254:தேதி :- 04 செப்டம்பர் 2017
* உட்கட்சி கலாச்சாரம் *
“தனியாளுமைகள் - 08”
இளைஞர் அமைப்பின் கருதுகோள்-04
கூட்டம் நிகழ்ந்து கொண்டிருந்த தருணத்தின் மத்தியில் சண்முகம் உள்நுழைந்ததை யாரும் எதிர்நோக்காததால், ஒரு திகைப்பு அங்கு குழுமியிருந்த கூட்டத்தில் கல் விழுந்த குளம் போல அலை உருவாக்கி மெல்ல அது வெளியெல்லையைத் தொட்டு மையத்ததை நோக்கி மீண்டது . சிறிது நேர அமைதிக்கு பிறகு கூட்டம் தொடர்ந்தது . அது ஒரு ஆலோசனை கூடுகை போல ஒருங்கியதால் யாருக்கும் அங்கு நாற்காலிகள் போட்டிருக்கவில்லை, அனைவரும் விரிக்கப்பட்டிருந்த ஜமுக்காலத்தில் அமைந்திருந்தார்கள் . பழைய அமைப்பிலிருந்து அனைவரும் வந்திருந்தனர் . கமலக்கண்ணன் பச்சமுத்து இரண்டு சேகர் என்று . வேதாளம் போல கமலக்கண்ணனும் பழைய ஆட்டத்தை விடாது ஆடிக்கொண்டிருந்தான் . பேசிய அனைவரும் பாலனையும் கண்ணனையும் திட்டித்தீர்த்தார்கள் . இறுதியாக சண்முகம் பேசினார் . அது ஒரு நல்ல உரையாடல் மிக எதார்த்தமாக யாரையும் குற்றம்சொல்லாது , இனி ஆகவேண்டியத்தைப் பற்றிய உரையாடலாக அது இருந்தது . கூடுகையில் பேசியவர்கள் கைகளில் மைக் மாறி மாறி பயணித்தபடி இருந்தது . நான் அதில் இறுதிவரை பேசவில்லை . அதற்கு என்னியல்பான தடை . ஆனால் அந்த கூடுகை என்னை அடுத்தகட்டத்திற்கு கொண்டுசென்றது .
சண்முகம் திமுக கூட்டணி அரசாங்கம் பதவி ஏற்ற பிறகு நடந்த முதல் பத்திரிக்கையாளர் கூட்டத்தில் , தேர்தல் வெற்றி தோல்விகள் கட்சியின் ஆயுளை முடிவு செய்பவைகளல்ல அவை அன்றைய களநிலைகளை கருத்தில்கொண்டு பொதுமக்களின் புரிதல்களால் விளைபவை . அவற்றில் இருந்து கட்சி அவதானிப்பதே அதன் எதிர்காலத்தை நிர்ணயிப்பது . புதிதாக ஆட்சி பொருப்பேற்றிருக்கும் அரசாங்கத்தின் செயல்பாடுகளை உடனேயே விமர்சிப்பது ஜனநாயகத்திற்கு விரோதமானது . எனவே அரசாங்கத்தின் அடுத்த ஆறுமாத கால செயல்பாடுகளை அவதானித்த பிறகுகே அதை விமர்சிப்பது சரியாக இருக்க முடியும் என்றார் . இளைஞர் காங்கிரசின் நிலையை பற்றிய கேள்வி எழுந்ததும் . அவை இன்னும் சில காலத்தில் சரிசெய்யப்பட்டுவிடும், என கூறி அந்த பத்திரிக்கையாளர் கூட்டத்தை முடிய்த்துவைத்தார்.
அதற்கு முதல்நாள்தான் நான் கூட்டிய கூடுகை நிகழ்ந்தது. அதன் தொடர்ச்சியாக இனி நான் செய்யக்கூடும் என்பதை பற்றிய சிந்தனை என்னை சூழ்ந்ததிரிந்தது . வழமைபோல அந்தக்கூடுகையில் நான் பேசும் வாய்ப்பை பெறவில்லை . நான் அதை செய்யும் இடத்திலேயும் இல்லை . அரசியல் என்பதில் பேச்சி ஒரு ஆளுமையை நிர்ணயிப்பது . எனக்கான இயற்கையிலேயே பேசுதலில் உள்ள குறைபாடால் , அந்த கூடுகையை என்னை நோக்கி திருப்பி முடியவில்லை . ஆனால் அரசியலில் பேசுவதுமட்டுமே ஸ்தானத்தை முடிவுசெய்யவதில்லை . அதை எனக்கெதிரான வெற்றியாக ,இதை எனக்கான அறைகூவலாக எடுத்துக்கொண்டேன். நான் இதை கடந்தேயாக வேண்டும் . இதை கடப்பது ஒவ்வொரு கட்டத்திலும் முக்கியத்துவம் வாய்ந்தது . இது ஒரு தடையாக எழுவதை அனுமதிக்கக்கூடாது என அப்போது முடிவு செய்தேன் . எனக்கு அணுக்கமான சிலருடன் அந்த ஒருவருடத்திற்கும் மேலாக புதுவையின் பல்வேறு பகுதிகளில் சிறு சிறு கூடுகைகளை ஏற்படுத்தி அதில் சிறு சிறு உரையாடல்களின் வழியாக எனது மனத்தடைகளை உடைக்க துவங்கினேன் . அந்த இடைப்பட்ட காலத்தில் இருநூற்று ஐம்பதுக்கும் அதிகமான கூடுகை மூலமாக எனது உளத்தடையை மீறி எழுந்துவந்தேன் . கோர்வையாக , விஷயங்களை தொடுத்து பேசக் கற்றது இங்குதான் . அது என்னை சிறந்த மேடை பேச்சாளாராகவெல்லாம் மாற்றிவிடவில்லை . ஆனால் அது என்னால் கூட்டங்களில் பேசுகிற தன்னம்பிக்கையை வளர்த்துக் கொடுத்தது . மேலதிகமாக பல பகுதிகளில் வாழும் இளைஞர்களின் நேரடி தொடர்பும் . அவர்கள் வாழ்வியல் களநிதர்சனமும் , அதில் அவர்கள் எதிர்கொள்ளும் போதாமையும் துலங்கி வந்தது .
எனது இளைஞர் காங்கிரசின் கூடுகைகள அந்தந்த பகுதி செயல்பாட்டாளர் வீட்டிலேயே நடத்துவதை சிறிது மாற்றம் செய்து நான் வெகு விரைவாக அவர்களில் ஒருவனாக மாறிப்போனேன் . இந்த வளர்ச்சிக்கு என் அரசியல் எதிர் நிலைப்பாட்டாளர்களுக்குத்தான் நன்றி சொல்லவேண்டும் . அவர்களின் காத்திரமான விமர்சனமும், பகடியும் ,எள்ளலும் என்னை உருவாக்கி எடுத்து . அதன் பின் எனக்கு ஏற்படும் தடைகளை கடப்பதே என் அரசியல் வழிமுறை என்றானது
பிரதேச கமிட்டியின் மூத்த நிர்வாகிகளை அதில் பங்குபெற வைக்கும் முயற்சியை துவங்கினேன் . முதலில் எங்கள் அமைப்பிலிருந்தே இதற்கு கடும் எதிர்ப்பு கிளம்பியது . அதை பழைய தொடர்புகளின் பலத்தால்நிகர் செய்ததால் யாரும் அதற்கு எதிர்ப்பாக எழமுடியவில்லை . இந்த எதிர்மறை போக்கை மாற்றாது பலம் பெறமுடியாது என்பதை விளக்கிச்சொல்லியெலாம் அதை செய்துவிட முடியாது . அதற்கான காலம் வரும் போது அவர்களுக்கே அது புரிந்துவிடும்.
மெல்ல அந்தந்த பகுதிகளின் மூத்த நிர்வாகிகளுடன் எங்கள் கூடுகை நிகழ துவங்கியது. முதலில் மூத்த நிர்வாகிகள் இதை தடுக்கத்தான் முயற்சித்தனர் . தலைவருடன் எனக்கான நெருக்கம் அவர்களது முயற்சிகளை ஒன்றுமில்லாது செய்துவிட்டது . சரி செய்யமுடியாத இடங்களில் மாற்றுதலைமையை வைத்து நடத்த முயற்சித்தும் அவர்கள் தானாக வரத்துவங்கினர் . இதில் நான் எதிர்நோக்காத ஒன்று அந்த இரண்டு அமைப்பும் விரைவில் ஒன்றிணைந்து செயல்பட துவங்கியது . நான் மாநில அரசியலில் கவனம் குவிக்க துவங்கிய போது ஒரு வலுவான அமைப்பாக அது உருமாற்றமடைந்திருந்தது . சரி செய்ய முடியாத மூத்த நிர்வாகிகள் எதிர்ப்புநிலை நிரந்தரமாக மாறினாலும் அவர்களால் உருவாகிவந்த புது அமைப்பை ஒன்றும் செய்ய இயலவில்லை.
கருத்துகள் இல்லை:
கருத்துரையிடுக