ஶ்ரீ:
பதிவு : 335 / 507 / தேதி :- 14 மே 2018
* திருப்பங்களின் பொருள் *
“ நெருக்கத்தின் விழைவு ” - 30
விபரீதக் கூட்டு -04.
காங்கிரஸிற்குள்ளேயே கூட தியாகம் , அற்பணிப்பு , காத்திருப்பு போன்ற பண்பைக் கொண்ட தலைமையை பார்த்து அரசியலை புரிந்து கொண்டவர்களும் , பொது ஜன கவர்ச்சிக்கு எதையும் சொல்லலாம் என்கிற “பரப்பியல்” கலாச்சார மாறுபாட்டை, “அரசியல்” என அதை நோக்கிய மனச்சாய்வு கொண்ட பிறிதொரு அமைப்பை உள்ளடக்கியதாக , அது மெல்ல மாற்றமடைந்து கொண்டிருந்தது . இளைஞர் காங்கிரஸார் ஏறக்குறைய அதைப் போன்ற “பரப்பியல்” கோட்பாடுகளை நம்ப துவங்கி இருந்தார்கள் . விழுமியங்கள் அர்த்தமிழக்க துவங்கி , தமிழக பாதிப்பும் மேலோங்கி அதிமுக இரண்டுமுறை ஆட்சியில் அமர்ந்தது , புதுவையிலும் திராவிட பாணி அரசியல் வளரத்துவங்கிது , போன்றவை அதற்கு அடிப்படை காரணிகளாக இருந்திருக்கலாம் .
மரபான கோட்பாடுகளில் நம்பிக்கையுள்ள அமைப்பு சண்முகத்தை விட்டு விலகியதால் ஏற்பட்ட வெற்றிடத்தை புதிய சிந்தனையாளர்களாக சிலர் நிரம்பியதும் , காங்கிரஸின் அடிப்படை மாற்றமடைந்து விட்டது . கண்ணன் தலைமையிலான இளைஞர் காங்கிரஸும் அமைப்பும் இப்படிப்பட்ட கலவையாக இருந்தாலும் , அவர்களுக்கு காமராஜ் என்கிற ஒரு பிம்பம் ஏற்புடையதாகவும் பிற கோட்பாட்டை நோக்கி செல்ல ஒரு தடையாகவும் இருந்தது . அதனால் நவீன போக்குள்ளவர்களாக தங்களை இந்த இரு கோட்பாட்டின் மத்தியில் தங்களுக்கான பாதையை அவர்கள் ஏற்படுத்திக்கொண்டார்கள்.
புதுவையை தமிழகத்துடன் இணைப்பதற்கு எதிர் நிலை எடுத்த போராட்டங்கள் காங்கிரஸுக்கு உயிர்நீர் வார்த்திருந்தது . ஆனால் கட்சிக்குள் ஏற்பட்டிருந்த வெற்றிடமும் , சண்முகத்துற்கு தன்னை நிறுவிக்கொள்ள வேண்டிய நிர்பந்த்தால் 1980 தேர்தலுக்கு அவருக்கு திடீர் காங்கிரஸார் தேவைப்பட்டார்கள். கட்சிக்கு வெளியே புதிய முகங்களை தேடத் துவங்கியது அப்போதுதான் . அதன் விளைவை பின்னாளில் அவர் சந்திக்க வேண்டி இருந்தது . திமுக வுடன் கூட்டணி ஏற்பட்டது இந்த சூழலில்.
“பரப்பியும்” என்று சொல்லப்படுகிற யுக்தி மூலமாக செய்கிற அரசியல் , விழுமியங்களை கொண்டு அரசியலை பார்ப்பவர்களுக்கு திகைப்பையும் மிரட்சியையும் கொடுத்தது . அதற்கு சமமாக மேடையை கையாள்வதில் ஏற்பட்ட , புரியாமை , தொய்வு , அலட்சியம் , பண்ணையார் மேட்டிமை போன்ற நடத்தையும், நவீன குடிமை சமூகம் அடைந்திருந்த மாற்றத்தையும் காங்கிரஸ் தலைவர்கள் கணிக்க தவறியதும் அவர்களுக்கு அரசியலில் ஒரு சறுக்கலை ஏற்படுத்தி இருந்தது .
கருத்துகள் இல்லை:
கருத்துரையிடுக