ஶ்ரீ:
பதிவு : 329 / 501 / தேதி :- 08 மே 2018
*வதந்திகளின் அரசியல் *
“ நெருக்கத்தின் விழைவு ” - 24
விபரீதக் கூட்டு -04.
தனித்த அரசுகளையே கொடுத்து வந்த காங்கிசிற்கு 1980ல் கூட்டணி அரசாங்கம் நடத்துவது புதிய அனுபவமாக இருந்திருக்க வேண்டும் . அதற்கு முன்பாக 1974 முதல் 1980 வரையிலான காலத்தில் புதுவையில் ஸ்திரமான ஆட்சி உருவாகாதவாறு காங்கிரஸ் பார்த்துக்கொண்டதாக எங்கும் பேச்சாக இருந்தது . அதிமுக இரண்டு முறை ஆட்சியில் அமர்ந்தும் , அதனால் ஆட்சியை முழு ஆயுளுக்கும் தொடர முடியவில்லை . முதல்முறை ஆட்சி 22 நாட்களும் , இரண்டாவது முறை ஒன்றரை வருடகாலம் மட்டுமே அதன் ஆயுட்காலம் நீடித்தது . மீதி காலம் முழுவதும் முன்னும் பின்னுமாக ஜனாதிபதி ஆட்சி பிரகடனம் செய்யப்பட்டு, துணைநிலை ஆளுநரால் கீழ் ஆளப்பட்டது . .துணைநிலை ஆளுநருக்கு பின்னால் இருந்து மாநில கங்கிரஸின் தலைமைதான் மறைமுகமாக ஆள்கிறது என்கிற குற்றச்சாட்டும் இருந்தது. செய்திகளும் அதற்கு இணையான வதந்திகளே அரசியலின் களப்போக்கை எப்போதும் நிர்ணயிப்பவைகள்.
1974- 80 வரையிலான ஆட்சி கவிழ்ப்புகளின் பின்னால் சண்முகம் செயல்பட்டதாக அலர் புதுவை முழுவதும் இருந்தது . அது ஓரளவிற்கு உண்மையும் கூட . அந்த நிகழ்வுகளினால் சண்முகத்திற்கு “கிங் மேக்கர்” என்கிற அந்தஸ்தும், அனைத்து கட்சி தலைவர்கள் மத்தியில்அவர் மீது ஒரு அச்சம் ஏற்படவும் காரணமாக இருந்தது . அதை தனது இறுதி காலம் வரை தக்கவைத்துக் கொண்டு , புதுவை அரசியலை தன்னை மையப்படுத்தியே எப்போதும் இருக்குமாறு பார்த்துக் கொண்டார் . அது அவரை பெரும் ஆளுமையாக வெளிப்படுத்தியது . மேலும் இந்திராகாந்தியுடன் அவருடைய அணுக்கமான தொடர்பு தென்னக காங்கிரஸின் செயல்பாடுகளில் அசைக்க முடியாத தலைவராக உருவெடுக்க வைத்தது .
ஒரு கட்சியின் மாநில தலைமை பதவி தொடர்ந்து ஒருவரிடம் நீடித்ததால், அது கட்சிக்கு ஒரு அரசியல் ஸ்திரத்தன்மையை ஏற்படுத்தி விடுகிறது . புதுவையில் காங்கிரஸ் இன்னுமும் கூட முதல் நிலை கட்சியாக இருப்பதற்கு அது அடிப்படை காரணியாக இருக்கலாம் . ஸ்திரமான தலைமையை கொடுக்கும்சூழலும் தனது அதிகாரத்தின் கீழ் பல ஆண்டுகள் கட்சியும் , ஆட்சியும் இருக்கும் போது அதை இயக்கும் சக்திக்கு , மாநில அரசியல் தன்னை சார்ந்து இருக்கும்படியான ஒரு பிண்ணலை உருவாக்கிக் கொள்ள நினைப்பது இயல்பானதே.
கூட்டணி அரசாங்கத்தில் அதன் உறுப்பினர்களுக்குள் சிக்கலுக்கு எப்போதும் பஞ்சம் இருக்கப்போவதில்லை . அதற்கான முதல் விதையை ஊன்றுபவர்கள் அரசாங்க அதிகாரிகள் . காரணம் அமைச்சர்களின் நியமனம் அதுவரை இருந்த தொடர் நடைமுறைகள் மற்றும் அரசாங்க அதிகாரிகளின் செயல்பாடுகளை முடக்கியும், ஊடுறுவியும் அமைவதால், அவர்கள் அதை தங்களின் தடையாக பார்ப்பார்கள் . அதில் தொடங்கும் உள்ளூழல் ,அமைச்சர்களுக்குள் சிண்டு முடிவதும் , அதிகரிகளிடையே நிகழும் கோப்பு பரிவர்த்தனைகளை மேல் , கீழ் அடுக்குமுறையில் செய்யப்படும் மாற்றம் மூலமாக தங்கள் அரசியலை நிகழ்த்திக்கொள்வதில் சமர்த்தர்களாக இருப்பதால் . அரசியலில் நீண்ட அனுபவம் உள்ளவர்கள் மட்டுமே அதிகாரிகள் செய்யும் அரசியலில் சிக்காது வெளிவர முடியும் . அதிகாரிகள் நிகழ்த்தும் அரசியலும் , அதிலிருந்து வெளிவருதலே அமைச்சர்களின் முதல்நிலை சவால்.
கருத்துகள் இல்லை:
கருத்துரையிடுக